TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
TÜRKSOY-un xalq çalğı alətləri orkestrinin Yaponiya turnesi möhtəşəm qala-konsertlə başa çatıb
TÜRKSOY-un xalq çalğı alətləri orkestrinin Yaponiya turnesi Tokionun Mequro rayonunda yerləşən “Presimmon Hall” konsert zalında möhtəşəm qala-konsertlə başa çatıb. AZƏRTAC xəbər verir ki, türk dünyasını təmsil edən 12 ölkədən 50 artistin iştirakı ilə təşkil edilən konsert proqramı yapon tamaşaçıları tərəfindən böyük maraq və alqışlarla qarşılanıb. Noyabrın 20-də təşkil olunan qala-konsertdə əvvəlcə TÜRKSOY-un baş katibi Düsen Kaseinov çıxış edərək qonaqları salamlayıb. Qeyd edib ki, TÜRKSOY-un yaradılmasının 25 illiyi münasibətilə təşkil edilən Yaponiya turnesi artıq on gündür davam edir. Noyabrın 13-də Yaponiya İncəsənət Universitetində, 14-də Kavasaki, 15-də Yokohama, 16-da Akasaka, 18-də Hamamtsu şəhərlərində təşkil edilən konsertlərdə bütün türk dünyasını əhatə edən mahnı və rəqslər nümayiş etdirilib. TÜRKSOY təşkilatının yaranması və tarixi haqqında məlumat verən D.Kaseinov qeyd edib ki, təşkilatın məqsədi türk mənşəli xalqların birliyini gücləndirmək, bu xalqların qədim, zəngin mədəniyyətini dünyaya tanıtmaq və eləcə də gələcək nəsillərə çatdırmaqdan ibarətdir. “Bu baxımdan 2016-cı ildə TÜRKSOY tərəfindən türk mənşəli xalqların musiqiçilərindən ibarət xalq çalğı alətləri orkestrinin yaradılması bizim ümumi mədəniyyətimizi, adət-ənənələrimizi bütün dünyada tanıtmaq üçün vacib rol oynayır. TÜRKSOY-un xalq çalğı alətləri orkestri türkmənşəli xalqlardan - Azərbaycan, Qazaxıstan, Qırğızıstan, Özbəkistan, Türkmənistan, Türkiyə, Rusiya Federasiyasının Muxtar respublikalarından Altay, Tatarıstan, Başqırdıstan, Xakasiya, Tuva, Saxa-Yakutiya, həmçinin Monqolustan və Qaqauziyadan (Moldova) olan ifaçıları özündə birləşdirərək, bir konsertlə bütün dünyanı vahid türk mədəniyyətinə qovuşdurur. Orkestrin ifaçıları türk dünyasının müxtəlif xalqlarına məxsus peşəkar solistlərdən və rəqqaslardan ibarətdir”,- deyə baş katib vurğulayıb. D.Kaseinov qeyd edib ki, Azərbaycan, Qazaxıstan, Qırğızıstan, Türkmənistan və Türkiyənin Tokiodakı səfirliklərinin dəstəyi ilə təşkil edilən Yaponiya turnesi zamanı nümayiş etdirilən konsertlər yapon musiqisevərlərin böyük diqqətinə və marağına səbəb olub. Baş katib təşkilatın yubileyi ilə əlaqədar turnenin təşkilinə göstərilən köməyə görə Yaponiya hökumətinə, konsertlərin keçirildiyi şəhərlərin meriyalarına və türk mədəniyyətinə böyük diqqət və marağa görə isə yapon tamaşaçılara minnətdarlığını bildirib. Azərbaycanlı musiqiçilər - Muğam televiziya müsabiqəsinin laureatı Babək Quliyevin, Rasim Zərbəliyevin (tar), beynəlxalq müsabiqələr laureatı Şəhriyar Musayevin (kamança), Azərbaycanın Əməkdar artisti Çinarə Heydərovanın (kanon) və Elnur Əliyevin (nağara) də qatıldığı konsert proqramı ümumilikdə 2 saata yaxın davam edib və yapon musiqisevərlər tərəfindən böyük maraqla qarşılanıb. Azərbaycanlı musiqiçilərin ifa etdiyi “Qarabağ şikəstəsi”, H.Rzayevin “Çahargah rapsodiyası”, Ə.Tağıyevin “Sən gəlməz oldun” mahnıları tamaşaçıların alqışlarına səbəb olub. AZƏRTAC-ın Yaponiyadakı xüsusi müxbiri ilə konsert barədə təəssüratlarını bölüşən Tokio Universitetinin professoru Akira Matsunaqa, “Otto” restoranlar şəbəkəsinin meneceri Kimizuka Hiroyuki və “Neos-ai land” şirkətinin meneceri Neo Suqiura bildiriblər ki, TÜRKSOY-un 25 illik yubileyi münasibətilə təşkil edilən qala-konserti böyük məmnuniyyətlə izləyiblər. Həm azərbaycanlı, həm də digər türkmənşəli xalqların milli musiqisi həzinliyi və gözəlliyi ilə onları heyran edib. Bu xalqlar eyni mənşədən olsalar da, musiqilərindəki rəngarənglik, çalarlar çox valehedicidir. Təqdim etdikləri gözəl musiqi axşamına görə təşkilatçılara minnətdarlığımızı bildiririk. Yaponiya turnesinin yekunları barədə fikirlərini bölüşən TÜRKSOY-un baş katibi D.Kaseinov isə deyib: “Düşünürəm ki, turne zamanı təşkil edilən konsertlər həm tamaşaçılar, həm də artistlər tərəfindən razılıqla qarşılandı, hər iki tərəf bu bayramdan böyük zövq aldı. Fikrimcə 10 gün davam edən konsertlər ərzində yapon musiqisevərlərə böyük türk musiqisi - qazax köyü, Azərbaycan muğamı, qırğız dastanı, türk rəqsləri və hətta Sibir xalqlarının mədəniyyəti barədə kifayət qədər məlumat verə bildik. Bu gün isə Tokionun ən böyük zallarından birində çoxsaylı tamaşaçıları bir araya gətirməyə nail olduq. Özünüz də şahidi oldunuz ki, çox böyük olmasına baxmayaraq, zalda yer yox idi, biz ehtiyat edirdik ki, birdən qonaqların sayı oturacaqların sayından çox olar və biz pis vəziyyətə düşərik. Səmimi deyim ki, bir çox hallarda, xüsusən də xarici səfərlərdə belə halla qarşılaşmaq çətindir. Turnenin yüksək səviyyəli təşkilinə görə, iştirakçı səfirliklərə, təşkilatçılara bir daha minnətdarlığımı bildirmək istəyirəm. Mən yapon tamaşaçıların gözlərində türk mədəniyyətinə böyük marağı gördüm və düşünürəm ki, bu gələcək əməkdaşlıq üçün xoş zəmin yaradır. Gələn görüşlərədək”.
 
İzmirdə Türkdilli Ölkələrin Parlament Assambleyasının plenar iclası keçirilir
Noyabrın 21-də Türkiyənin İzmir şəhərində Türkdilli Ölkələrin Parlament Assambleyasının (TÜRKPA) 8-ci plenar iclası işə başlayıb. AZƏRTAC xəbər verir ki, Azərbaycan Respublikası Milli Məclisinin sədri Oqtay Əsədovun rəhbərlik etdiyi nümayəndə heyəti iclasda iştirak edir. Nümayəndə heyətinin tərkibinə Milli Məclisin səhiyyə komitəsinin sədri Əhliman Əmiraslanov, deputatlardan Hikmət Məmmədov, Nizami Cəfərov, İlham Əliyev, Sevinc Hüseynova, Sədaqət Vəliyeva, Ağalar Vəliyev, parlament Aparatının rəhbəri Səfa Mirzəyev və digər rəsmi şəxslər daxildir. Türkiyə Böyük Millət Məclisinin sədri Binəli Yıldırımın sədrliyi ilə keçirilən iclasa təşkilata digər üzv ölkələrin - Türkiyə, Qazaxıstan və Qırğızıstanın parlamentlərinin nümayəndə heyətləri, o cümlədən türk dünyasının birliyi və inkişafı istiqamətində fəaliyyət göstərən, eləcə də TÜRKPA-ya tərəfdaş olan təşkilatların rəhbərləri qatılıblar.
 
Londonda Dünya Xəbər Agentlikləri Konqresi Şurasının növbəti iclası keçirilib
London, 17 noyabr, AZƏRTAC Noyabrın 16-da Böyük Britaniyanın paytaxtı Londonda Press Association agentliyinin təşkilatçılığı ilə Dünya Xəbər Agentlikləri Konqresi Şurasının növbəti iclası olub. İclasda 2019-cu ildə Bolqarıstanın paytaxtı Sofiyada keçiriləcək Dünya Xəbər Agentliklərinin 6-cı Konqresinə hazırlıq işləri və təşkilati məsələlər müzakirə edilib. İclasda AZƏRTAC, Böyük Britaniyanın Press Association, ABŞ-ın Associated Press, Almaniyanın DP, Rusiyanın TASS, İspaniyanın EFE, Küveytin KUNA, Bolqarıstanın BTA agentliklərinin rəhbərləri və nümayəndələri, həmçinin Ərəb Xəbər Agentlikləri Federasiyasının (FANA) və Avropa Xəbər Agentlikləri Alyansının (EANA) baş katibləri iştirak ediblər. Yeri gəlmişkən, bu tədbirdə AZƏRTAC-ı xarici dillərdə informasiya və beynəlxalq əlaqələr idarəsinin sabiq müdiri, London Şəhər Universitetinin (City, University of London) tələbəsi Anar Rzayev təmsil edib. Müzakirələr zamanı 6-cı konqresdə iştirakı nəzərdə tutulan nümayəndələrə hazırkı prezident, AZƏRTAC-ın İdarə Heyətinin sədri Aslan Aslanovun, Bolqarıstanın BTA agentliyinin baş direktoru və Konqresin baş katibi Maksim Minçevin, eləcə də Şuranın sədri, Böyük Britaniyanın Press Association agentliyinin baş icraçı direktoru Klayv Marşalın adından rəsmi dəvət məktublarının gələn ilin əvvəlindən göndərilməsi qərara alınıb. Planlama görüşündə Konqresin saytının idarə olunmasının gələn ilin yanvarından AZƏRTAC tərəfindən Bolqarıstanın BTA agentliyinə təhvil verilməsi məsələsinə də baxılıb. Daha sonra Konqresin 2019-cu il iyunun 13-14-də Sofiyada, mədəni tədbirlərin isə Plovdivdə keçirilməsi təsdiqlənib. Klayv Marşalın, Maksim Minçevin, Fərid Əyyarın Konqresin üzvü olan agentliklər arasında əlaqələrin daha da möhkəmləndirilməsi və müzakirəsi nəzərdə tutulan mövzularla bağlı təklifləri diqqəti cəlb edib. Rusiyanın TASS agentliyinin baş direktorunun birinci müavini, Şuranın vitse-prezidenti Mixail Qusman bu yaxınlarda Bakıda və Sankt-Peterburqda keçirilmiş yanlış məlumatlandırma siyasəti mövzusunda işçi sessiyaların əhəmiyyətindən danışaraq feyk xəbərlər probleminin Konqresin mövzuları sırasına salınmasının vacibliyini vurğulayıb. Beləliklə, Konqresin “Yeni gəlir mənbələri”, “Yanlış xəbər”, “Süni intellekt”, “Şaxələnmə” mövzularında dörd işçi sessiyasının keçirilməsi, eləcə də bu sessiyaların dörd moderator tərəfindən idarə olunması təsdiqlənib. Şura üzvləri Dünya Xəbər Agentlikləri Konqresindən əvvəl növbəti planlama iclasının 2019-cu il martın 7-də Sofiyada keçirilməsini qərara alıblar. Xatırladaq ki, Dünya Xəbər Agentliklərinin 5-ci Konqresi 2016-cı il noyabrın 16-17-də Bakıda keçirilib. Hazırda AZƏRTAC Dünya Xəbər Agentlikləri Konqresinin prezidentidir.
 
AZƏRTAC-da görüş: Çinli alim terrorizmin fəsadlarına dair kitabına Azərbaycan həqiqətlərini də daxil edəcək
Bakı, 25 oktyabr, AZƏRTAC AZƏRTAC ilə Sinxua arasında sıx əməkdaşlıq Azərbaycan-Çin münasibətlərinin inkişafına mühüm töhfə verir. Bu fikri ölkəmizdə səfərdə olan Çinin Sincan-Uyğur Muxtar Vilayətinin mütəxəssis-ekspertlərindən ibarət nümayəndə heyətinin rəhbəri, Sosial Elmlər Akademiyasının Çin Sərhəd Tədqiqatları bölməsinin baş direktoru Si Guançenq oktyabrın 25-də AZƏRTAC-da keçirilən görüşdə deyib. Azərbaycanda keçirdikləri görüşlərin əhəmiyyətini vurğulayan Si Guançenq bildirib ki, səfərin məqsədi ölkələrimiz barədə həqiqətlərin xalqlarımıza çatdırılması işinə töhfə vermək, qarşılıqlı mədəni əlaqələrin, tarix, mədəniyyət və din sahələrində mübadilənin inkişaf etdirilməsidir. Baş direktor Azərbaycan ilə Çinin Sincan-Uyğur Muxtar Vilayəti arasında müxtəlif sahələrdə, o cümlədən media sahəsində əməkdaşlığın perspektivlərindən danışıb. AZƏRTAC-ın İdarə Heyətinin sədri Aslan Aslanov Azərbaycan ilə Çin arasında əlaqələrin yüksələn xətlə inkişaf etdiyini, ölkələrimizin iştirakı ilə Asiya və Avropanı birləşdirən nəhəng layihələrin reallaşdırıldığını diqqətə çatdırıb. Vurğulayıb ki, Azərbaycan Prezidenti ilə Çin Sədri arasında olan səmimi münasibətlər bu əlaqələrin inkişafında mühüm rol oynayır. Şanxay Əməkdaşlıq Təşkilatının birinci Media Sammitində iştirak etmək üçün Pekinə səfərini, Sinxua agentliyinin prezidenti Çay Mincao və agentliyin nazir statusunda baş redaktoru Hi Pinq ilə görüşlərini xatırladan İdarə Heyətinin sədri AZƏRTAC-Sinxua əməkdaşlığından söhbət açıb, xalqlarımız arasında əlaqələrin dərinləşməsində hər iki ölkənin milli informasiya agentliklərinin göstərdiyi səyləri vurğulayıb. Müasir dünyada baş verən terror aktlarının ağır fəsadlarından danışan Çinin Müasir Beynəlxalq Münasibətlər Akademiyasının elmi işçisi Li Vei bildirib ki, Sincan-Uyğur Muxtar Vilayəti də uzun illər qarşıdurmalardan, terrordan əziyyət çəkib. “Mən dünyada baş verən qarşıdurmaları, terror aktlarını uzun illər araşdırdıqdan sonra bu barədə kitab yazıram. Kitabda təkcə Çində deyil, dünyanın müxtəlif yerlərində törədilmiş qanlı cinayətlər barədə məlumat verilir”, - deyə o əlavə edib. Aslan Aslanov Li Veinin apardığı araşdırmanın böyük əhəmiyyət daşıdığını deyib və ümidvar olduğunu bildirib ki, çinli alim Ermənistanın Azərbaycanda törətdiyi terror aktlarını da araşdıraraq kitabına daxil edəcək. “Azərbaycan uzun illər erməni terrorundan əziyyət çəkib. Ermənistan tərəfindən ölkəmizin ərazilərinin 20 faizi işğal olunub, bir milyondan çox soydaşımız qaçqın və məcburi köçkünə çevrilib, işğal altında olan torpaqlarımızda bütün mədəni, tarixi, milli abidələrimiz, məscidlər məhv edilib. Ermənilər müasir dünyanın gözü qarşısında Azərbaycanın Xocalı şəhərində dəhşətli soyqırımı törədib, bir gecədə 63-ü uşaq, 106-sı qadın, 70-i qoca olmaqla, 613 dinc sakini qətlə yetiriblər. Hesab edirəm ki, bütün bunları Çin oxucusuna çatdırmaq çox vacibdir”, - deyə İdarə Heyətinin sədri vurğulayıb. Çinli alim Ermənistan tərəfindən Azərbaycan xalqına qarşı törədilən terror aktlarını, vandalizm hərəkətlərini araşdırıb bu barədə həqiqətləri də öz kitabına daxil edəcəyini bildirib. Çinin Azərbaycandakı səfiri Vey Cinhuanın, elm xadimlərinin və jurnalistlərin də iştirak etdikləri görüşdə, həmçinin qarşılıqlı maraq doğuran digər məsələlər müzakirə olunub.
 
Bakıda VI Beynəlxalq Humanitar Forumu işə başlayıb
Oktyabrın 25-də Heydər Əliyev Mərkəzində VI Bakı Beynəlxalq Humanitar Forumu işə başlayıb. AZƏRTAC xəbər verir ki, Azərbaycan Respublikasının Prezidenti İlham Əliyev, birinci xanım Mehriban Əliyeva və Heydər Əliyev Fondunun vitse-prezidenti Leyla Əliyeva Forumun rəsmi açılış mərasimində iştirak ediblər. “Yeni dünya və yeni insan formalaşdıraq: kreativlik və insan inkişafı” mövzusunda keçirilən VI Beynəlxalq Humanitar Foruma 86 ölkə və 24 beynəlxalq təşkilatdan 580-dən çox nümayəndə qatılıb. Dövlətimizin başçısı Forumun açılışında nitq söylədi. Sonra Rusiya Federasiyası Hökuməti sədrinin müavini xanım Olqa Qolodets Prezident Vladimir Putinin Forum iştirakçılarına müraciətini oxudu və çıxışında Forumun ildən-ilə inkişaf etdiyini, Bakının humanitar dialoq mərkəzinə çevrildiyini bildirdi. Daha sonra BMT baş katibinin müavini Rəşid Xalikov, ISESCO-nun baş direktoru Əbdüləziz Osman əl-Tuveycri, UNESCO-nun baş direktorunun müavini Qu Ksinq və Parlamentlərarası İttifaqın prezidenti xanım Qabriela Baron çıxış etdilər. 2010-cu ildən təşkil olunan Forumun təşəbbüsçüləri Azərbaycan və Rusiya prezidentləridir. Beynəlxalq Humanitar Forum qlobal xarakterli məsələlərə dair geniş spektrli dialoqlar, fikir mübadilələri və müzakirələr aparmaq məqsədilə müxtəlif ölkələrdən tanınmış dövlət xadimlərini, elmin fərqli sahələri üzrə Nobel mükafatı laureatlarını və nüfuzlu beynəlxalq təşkilatların rəhbərlərini, o cümlədən dünyanın siyasi, elmi və mədəni elitasının nümayəndələrini bir araya toplayan mötəbər tədbirdir. VI Bakı Beynəlxalq Humanitar Forumu gələcək dünyamızı formalaşdıracaq kreativ ideyalar və onların həyata keçirilməsi yollarının axtarılmasını diqqətdə saxlayacaq. Dünyanı vahid məkan və bütün bəşəriyyəti bir cəmiyyət kimi görmək istəyi yeni münasibətlər qurmağa, daha mütərəqqi və aktual müzakirələr aparmağa imkan verəcək və bəşəriyyətin inkişafına ənənəvi yanaşmalarda dəyişikliklərin yaranmasına vəsilə olacaq. Açılış çıxışlarından sonra Forum işini plenar və işçi sessiyalarla davam etdirəcək.
 
<< Başlat < Önceki 1 2 3 4 5 6 7 8 9 10 Sonraki > Son >>

Sayfa 3 > 1748
  TKA 2008