TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
“Mehmet Akif Ərsoydan Bəxtiyar Vahabzadəyə - iki şair bir şeir” mövzusunda beynəlxalq elmi panel
Mayın 2-də Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda “Mehmet Akif Ərsoydan Bəxtiyar Vahabzadəyə - iki şair bir şeir” mövzusunda beynəlxalq elmi panel keçirilib. Tədbir Ədəbiyyat İnstitutu, TİKA və Bakı Yunus Əmrə İnstitutunun birgə təşkilatçılığı ilə reallaşdırılıb. AZƏRTAC xəbər verir ki, əvvəlcə tədbir iştirakçıları Mehmet Akif Ərsoyun və Bəxtiyar Vahabzadənin əsərlərindən ibarət sərgi ilə tanış olublar. Tədbirdə çıxış edən institutun direktoru, AMEA-nın vitse-prezidenti, akademik İsa Həbibbəyli Azərbaycan ilə Türkiyə arasında dostluq və qardaşlıq əlaqələrinin tarixi köklərə bağlı olduğunu deyib. Akademik bu münasibətlərin dünyada nümunə olduğunu, ölkələrimiz arasında bütün sahələrdə olduğu kimi, elm, mədəniyyət və ədəbiyyat sahələrində də əlaqələrin inkişaf etdiyini söyləyib. İsa Həbibbəyli bildirib ki, ümummilli lider Heydər Əliyevin güclü təməllər üzərində qurduğu Azərbaycan-Türkiyə qardaşlığı bu gün prezidentlər İlham Əliyevin və Rəcəb Tayyib Ərdoğanın qətiyyətli addımları ilə daha da möhkəmlənir. Qeyd edilib ki, türk dünyasının böyük şairləri Mehmet Akif Ərsoyun və Bəxtiyar Vahabzadənin yaradıcılığına həsr edilən birgə tədbirin keçirilməsi bu dostluğa bariz nümunədir. İsa Həbibbəyli Mehmet Akif Ərsoyun və Bəxtiyar Vahabzadənin türk dünyasında istiqlaliyyət şairi kimi məşhur olduqlarını və sevildiklərini deyib, onların yaradıcılığındakı oxşar cəhətləri diqqətə çatdırıb. Qeyd edib ki, Mehmet Akif Ərsoy Türkiyədə cümhuriyyət ideyalarını ortaya atan, milli düşüncə, istiqlaliyyət fikirlərini yayan, dövlətçilik təfəkküründən çıxış edən şair olub. Əsərlərində Vətənə, torpağa, millətinə sevgi hisslərini aşılayan şairin yaradıcılığı bir məktəbdir. Türkiyənin İstiqlal marşının müəllifi Mehmet Akif Ərsoya ölkəmizdə sevgi, hörmət böyükdür. Xalqımızın istiqlal şairi Bəxtiyar Vahabzadə də Türkiyədə çox yaxşı tanınır, əsərləri böyük sevgi ilə oxunur. Bəxtiyar Vahabzadə hələ keçmiş SSRİ dövründə müstəqillik, milli istiqlal ideyalarından çıxış edib, əsərlərində bu mövzulara geniş yer verib. Onun müstəqillik illərində ölkələrimiz arasında mənəvi körpüləri birləşdirən şair kimi mühüm xidmətləri olub. Bu iki sənətkar istiqlal, milli düşüncə və dövlətçilik ideyalarını öz əsərlərində mükəmməl əks etdiriblər. Mehmet Akif Ərsoy və Bəxtiyar Vahabzadə Azərbaycanın və Türkiyənin ortaq milli, istiqlal şairləridir. Akademik İsa Həbibbəyli beynəlxalq tədbirin ölkələrimiz arasında elmin, ədəbiyyatın inkişafına dəyərli töhfə verəcəyini söyləyib. Tədbirdə Türkiyənin ölkəmizdəki səfiri Erkan Özoral, Bakı Yunus Əmrə İnstitutunun direktoru Cihan Özdemir, Türkiyə-Azərbaycan parlamentlərarası dostluq qrupunun rəhbəri Şamil Ayrım, Gelibolu tarixi zonasının rəhbəri İsmayıl Kaşdəmir, TİKA Bakı Nümayəndəliyinin əlaqələndiricisi Teoman Tiryaki və digər çıxış edənlər ölkələrimiz arasında dostluq münasibətlərindən, bu əlaqələrin möhkəmləndirilməsində və genişləndirilməsində ümummilli lider Heydər Əliyevin xidmətlərindən, eləcə də şairlərin yaradıcılığından söz açıblar. Sonra Azərbaycan və Türkiyədən olan alimlərin Mehmet Akif Ərsoyun və Bəxtiyar Vahabzadənin yaradıcılığına həsr olunan məruzələri dinlənilib.
 
Bakıda V Ümumdünya Mədəniyyətlərarası Dialoq Forumu işə başlayıb Azərbaycan Prezidenti İlham Əliyev Forumun açılışında iştirak edib
Mayın 2-də Bakıda “Ayrı-seçkilik, qeyri-bərabərlik və zorakı münaqişəyə qarşı fəaliyyət naminə dialoq quraq” şüarı altında V Ümumdünya Mədəniyyətlərarası Dialoq Forumu işə başlayıb. AZƏRTAC xəbər verir ki, Azərbaycan Respublikasının Prezidenti İlham Əliyev və birinci xanım Mehriban Əliyeva Forumun açılış mərasimində iştirak ediblər. Forum Azərbaycan hökumətinin təşkilatçılığı, UNESCO, BMT-nin Sivilizasiyalar Alyansı, Dünya Turizm Təşkilatı, Avropa Şurası və ISESCO-nun tərəfdaşlığı ilə keçirilir. Tədbirdə 100-dən çox ölkənin və 30-dan çox beynəlxalq təşkilatın yüksək səviyyəli rəsmiləri iştirak edirlər. 2008-ci ildən Azərbaycan Prezidenti İlham Əliyevin təşəbbüsü ilə həyata keçirilən “Bakı Prosesi” 10 il ərzində müxtəlif qitələrdə yaşayan fərqli etnik, mədəni, dini və linqvistik mənsubiyyəti olan ayrı-ayrı insanlar və qruplar arasında qarşılıqlı anlayış çərçivəsində səmimiyyət və hörmətə əsaslanan fikir mübadiləsi üçün müsbət platforma yarada bilib. Ötən müddət ərzində Forumun coğrafiyası çox genişlənib. Nəticədə tədbirə qoşulan qurumların sayı xeyli artıb. Budəfəki Foruma Latın Amerikası ölkələrindən tutmuş Səudiyyə Ərəbistanı, Böyük Britaniya kimi dövlətlərin təmsilçiləri qatılıblar. Beşinci Ümumdünya Mədəniyyətlərarası Dialoq Forumu çərçivəsində insanlar arasında həmrəylik yaratmaqda və müxtəlif icmalarda zorakılığa və ayrı-seçkiliyə qarşı mübarizədə mədəniyyətlərarası dialoqun mühüm rolu öyrənilir. Forum üç istiqamətdə davam edəcək.
 
Küveytdə Ərəb Xəbər Agentlikləri Təşkilatı Baş Assambleyasının 46-cı konfransı keçirilib
Dekabrın 2-3-də Küveyt Dövlətinin paytaxtı əl-Küveyt şəhərində Ərəb Xəbər Agentlikləri Təşkilatının (FANA) Baş Assambleyasının 46-cı konfransı keçirilib. AZƏRTAC xəbər verir ki, Küveytin Baş naziri Cabir Mübarək əl-Həməd əs-Sabahın himayəsi ilə keçirilən tədbirdə üzv agentliklərin rəhbərləri, o cümlədən Asiya və Sakit Okean Ölkələri Xəbər Agentlikləri Təşkilatının (OANA) və Dünya Xəbər Agentlikləri Konqresinin prezidenti, Azərbaycan Dövlət İnformasiya Agentliyinin – AZƏRTAC-ın İdarə Heyətinin sədri Aslan Aslanov və agentliyin ərəb dilində informasiya bölməsinin müdiri Şıxəli Əliyev iştirak ediblər. Konfransın açılışında çıxış edən Küveytin informasiya və gənclər üzrə dövlət naziri Məhəmməd əl-Cəbri bu gün dünyada sürətlə cərəyan edən hadisələrin, ortaya çıxan çağırışların mediaya təsirsiz ötüşmədiyini, bəzi mənfi təmayüllərin yaranmasına səbəb olduğunu bildirib. Nazir qeyd edib ki, xəbər agentlikləri cəmiyyətlərin sabitliyini pozmağa, insanlarda çaşqınlıq yaratmağa yönəlmiş yalan xəbərlərə qarşı sipər olmalıdırlar. Küveytli nazir AZƏRTAC-ın İdarə Heyətinin sədri, OANA-nın prezidenti Aslan Aslanova dəvəti qəbul edərək konfransda iştirak etdiyinə görə təşəkkürünü bildirib. Daha sonra FANA-nın prezidenti, Küveytin KUNA xəbər agentliyinin İdarə Heyətinin sədri Şeyx Mübarək Dueyc əl-İbrahim əs-Sabah və FANA-nın baş katibi Fərid Əyyar çıxış edərək konfransda müzakirə olunacaq məsələlər barədə məlumat verib, iştirakçıları fəal diskussiyalara çağırıblar. Açılış mərasimindən sonra nümayəndələr KUNA-nın təşkil etdiyi fotosərgi ilə tanış olublar. Sonra konfrans işçi iclaslarla davam edib. Birinci işçi iclasda FANA-nın illik fəaliyyəti barədə məruzə təqdim edilib və qarşıda duran problemlər, o cümlədən təşkilatın büdcəsi, treninq proqramlarında iştirak məsələləri barədə müzakirələr aparılıb. İclasda çıxış edən OANA-nın və Dünya Xəbər Agentlikləri Konqresinin prezidenti, AZƏRTAC-ın İdarə Heyətinin sədri Aslan Aslanov regional media qurumlarının səmərəli əməkdaşlığından danışıb. O, AZƏRTAC ilə Küveytin KUNA, Səudiyyə Ərəbistanının SPA agentlikləri arasında dostluq və əməkdaşlıq əlaqələrinin yüksələn xətlə inkişaf etdiyini vurğulayaraq əmin olduğunu bildirib ki, Küveytdə yüksək səviyyədə təşkil edilən konfrans həm FANA və OANA, həm də ərəb xəbər agentlikləri ilə AZƏRTAC arasında əməkdaşlığın daha da güclənməsinə təkan verəcək. “KUNA agentliyinin sədrliyi dövründə FANA çox mühüm irəliləyişlərə nail olub. Bu uğurda peşəkar media mütəxəssisi, AZƏRTAC-ın yaxın dostu, FANA-nın baş katibi Fərid Əyyarın ölçüyəgəlməz xidmətləri var. O nəinki FANA-nın, habelə Dünya Xəbər Agentlikləri Konqresi Şurasının, OANA-nın və digər regional media təşkilatlarının fəaliyyətinə də dəyərli töhfələr verir”, - deyə Aslan Aslanov qeyd edib. OANA-nın veb-saytının ərəb dünyası ilə bağlı məlumatların daha geniş coğrafiyada yayılması üçün mühüm platforma olduğunu vurğulayan Aslan Aslanov ərəb xəbər agentliklərini burada daha çox informasiya paylaşmağa çağırıb. O, AZƏRTAC-ın OANA-nın daha da təkmilləşdirilməsi, müasir tələblərə cavab verən quruma çevrilməsi üçün daimi baş katiblik ofisinin yaradılması, qurumun təlim akademiyasının təsis edilməsi, maliyyə komissiyasının formalaşdırılması və digər təkliflər irəli sürdüyünü xatırladıb, bununla bağlı ərəb xəbər agentliklərinin fikirlərinin də önəmli olacağını diqqətə çatdırıb. Hazırda medianın əsas problemlərindən birinə çevrilmiş yanlış xəbərlərin yayılmasının qarşısının alınması yollarına toxunan OANA-nın prezidenti etibarlı xəbər mənbələri olan agentliklərin daha sıx əməkdaşlıq qurmasına, informasiya və təcrübə mübadiləsini gücləndirməsinə ehtiyac olduğunu bildirib. İşçi iclaslarda bir sıra qərarlar qəbul olunub. Qeyd edək ki, FANA 1975-ci ildə yaradılıb. Mərkəzi qərargahı Livanda yerləşən bu təşkilat öz sıralarında 18 ərəb xəbər agentliyini birləşdirir. Ərəb Liqasının nəzdində fəaliyyət göstərən FANA-nın məqsədi media qurumlarının əməkdaşlığının gücləndirilməsi və üzv agentliklər arasında təcrübə mübadiləsinin genişləndirilməsidir. Şeyx Mübarək Dueyc əl-İbrahim əs-Sabah 2015-ci ildən FANA-ya sədrlik edir.
 
Küveytin Baş naziri FANA konfransının iştirakçıları ilə görüşüb
Dekabrın 2-də Küveytin Baş naziri Cabir Mübarək əl-Həməd əs-Sabah bu ölkənin dövlət xəbər agentliyinin (KUNA) ev sahibliyi ilə keçirilən Ərəb Xəbər Agentlikləri Federasiyasının (FANA) Baş Assambleyasının 46-cı konfransının iştirakçılarını, o cümlədən konfransa müşahidəçi kimi dəvət olunmuş Asiya və Sakit Okean Ölkələri İnformasiya Agentlikləri Təşkilatının (OANA) prezidenti, AZƏRTAC-ın İdarə Heyətinin sədri Aslan Aslanovu qəbul edib. Müasir dövrdə informasiyanın düzgün çatdırılmasında xəbər agentliklərinin üzərinə böyük məsuliyyət düşdüyünü vurğulayan Baş nazir cəmiyyətlərə mənfi təsir göstərən yanlış xəbərlərin qarşısının alınmasında jurnalistləri daha diqqətli olmağa və peşəkarlıq prinsiplərinə daim sadiq qalmağa çağırıb. Cabir Mübarək əl-Həməd əs-Sabah qeyd edib ki, hazırda dünyada islamafobiya halları və terroru İslam dini ilə bağlamaq cəhdləri geniş yayılıb. Baş nazir dezinformasiya və yanlış məlumatlandırma siyasətinə qarşı mübarizədə OANA və FANA kimi regional media təşkilatlarının fəaliyyətinin təqdirəlayiq olduğunu bildirib. Görüşdə bir sıra ərəb dövlətlərinin xəbər agentliklərinin rəhbərləri çıxış edərək Baş nazir Cabir Mübarək əl-Həməd əs-Sabahın toxunduğu məsələlərin aktuallığını və mövcud təhdidlərin, çağırışların qarşısının alınmasında xəbər agentlikləri arasında əməkdaşlığın inkişafının əhəmiyyətindən danışıblar. OANA-nın prezidenti, AZƏRTAC-ın İdarə Heyətinin sədri Aslan Aslanov çıxışında Azərbaycanla Küveyt arasında əməkdaşlıq əlaqələrinin dövlət rəhbərlərinin müdrik siyasəti nəticəsində daim yüksələn xətlə inkişaf etdiyini, bunun da öz növbəsində xəbər agentliklərinin üzərinə böyük məsuliyyət qoyduğunu bildirib. Müasir dövrdə qarşıya çıxan çağırışlara cavab vermək üçün agentliklər arasında əlaqələrin önəmini bir daha vurğulayan Aslan Aslanov AZƏRTAC-la KUNA-nın dostluq münasibətlərini və sıx əməkdaşlığını buna ən yaxşı nümunə adlandırıb. Bu fikirləri bölüşən Cabir Mübarək əl-Həməd əs-Sabah Küveyt ilə Azərbaycan arasında münasibətlərin inkişafında dövlət başçılarının böyük rolu olduğunu, xəbər agentliklərinin də öz ölkələrinin nailiyyətlərini təbliğ edərək dünyaya yaymaq üçün əməkdaşlığı gücləndirməsinin vacibliyini vurğulayıb. Baş nazir OANA-nın prezidenti Aslan Aslanovun FANA-nın konfransında iştirakından məmnunluğunu ifadə edib. Sonda Cabir Mübarək əl-Həməd əs-Sabah görüş iştirakçıları ilə xatirə şəkli çəkdirib.
 
FANA-nın sədri və OANA-nın prezidenti media qurumlarının əlaqələrini gücləndirmək yollarını müzakirə ediblər
Dekabrın 2-də Küveyt Xəbərlər Agentliyinin (KUNA) Baş direktoru, Ərəb Xəbər Agentlikləri Federasiyasının (FANA) sədri Şeyx Mübarək Dueyc əl-İbrahim əs-Sabah bu ölkədə səfərdə olan AZƏRTAC-ın İdarə Heyətinin sədri, Asiya və Sakit Okean Ölkələri İnformasiya Agentlikləri Təşkilatının (OANA) prezidenti Aslan Aslanovla görüşüb. AZƏRTAC xəbər verir ki, görüşdə FANA ilə OANA arasında əməkdaşlığın inkişaf etdirilməsinin zəruriliyi qeyd olunub, media sahəsində əlaqələrin gücləndirilməsi yolları barədə fikir mübadiləsi aparılıb. Söhbət zamanı, həmçinin Küveyt-Azərbaycan münasibətlərinə toxunulub. Belə bir yekdil fikir ifadə olunub ki, milli xəbər agentliklərinin əməkdaşlığı iki ölkəni birləşdirən əlaqələrin miqyasına uyğun səviyyədə genişləndirilməlidir. Aslan Aslanov görüşdən xatirə olaraq Şeyx Mübarək Dueyc əl-İbrahim əs-Sabaha milli ornamentlərlə bəzədilmiş Azərbaycan xalçası və kitablar hədiyyə edib. Kitablardan biri açılışında Azərbaycan Prezidentinin iştirak etdiyi Dünya Xəbər Agentliklərinin Bakı Konqresi barədədir. Konqresdə aparılan müzakirələrdə KUNA-nın Baş direktoru da çıxış edərək medianın aktual problemlərinin həlli barədə faydalı fikirlər səsləndirib. Konqresin materialları nəşrdə Azərbaycan dili ilə yanaşı, ingilis və rus dillərində verilib. Digər kitab isə dünya xəbər agentliklərinin, o cümlədən KUNA-nın təqdim etdiyi fotolar əsasında nəşr olunub. Görüşdən sonra KUNA agentliyinə müsahibə verən AZƏRTAC-ın İdarə Heyətinin sədri ölkələrimiz və xalqlarımız arasındakı səmimi dostluq əlaqələrindən danışaraq deyib: “Bu əlaqələr xalçanın bir-birinə sıx şəkildə toxunmuş ilmələrinə bənzəyir, qürur hissləri doğurur”. AZƏRTAC-ın İdarə Heyətinin sədri Küveytə səfərinin çox məhsuldar və işgüzar mühitdə keçdiyini bildirib, göstərilən xoş münasibətə görə minnətdarlığını ifadə edib. Vurğulayıb ki, qarşılıqlı səfərlər və görüşlər medianın inkişafı, müasir modellərin tətbiqi ilə bağlı təcrübə mübadiləsi, xəbər agentlikləri arasında əməkdaşlığın güclənməsi baxımından mühüm əhəmiyyət daşıyır.
 
<< Başlat < Önceki 1 2 3 4 5 6 7 8 9 10 Sonraki > Son >>

Sayfa 2 > 1749
  TKA 2008