TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
AZƏRBAYCAN GİMNASTI RUSİYADA KEÇİRİLƏN TURNİRDƏ 5-Cİ YERİ TUTMUŞDUR

AzərTAc Azərbaycan Gimnastika Federasiyasının mətbuat xidmətinə istinadla xəbər verir ki, Dmitrovda (Rusiya) bədii gimnastika üzrə beynəlxalq turnir başa çatmışdır.
12-13 yaşlı idmançılar qrupunda çıxış edən Aişə Mustafayeva Azərbaycan gimnastları arasında ən yaxşı nəticə göstərmişdir. O, iplə finalda 5-ci yerə, lentlə finalda 8-ci, çoxnövçülükdə 14-cü yerə çıxmışdır. Həmin yaş qrupunda Yuliya Semuşkina 22-ci, Ləman Dadaşlı (1998-ci il) 20-ci, Cənnət Məmmədova (1999-cu il) 15-ci yerləri tutmuşlar.

 
AZƏRBAYCANIN ƏRAZİ BÜTÖVLÜYÜNÜN DƏSTƏKLƏNMƏSİ ƏFQANISTANIN XARİCİ SİYASƏTİNİN ƏSAS İSTİQAMƏTLƏRİNDƏNDİR

AzərTAc xəbər verir ki, Azərbaycanda səfərdə olan Əfqanıstanın xarici işlər naziri Ranqin Dadfar Spanta dekabrın 17-də Milli Məclisin sədri Oqtay Əsədov ilə görüşmüşdür.
Qonağı salamlayan Oqtay Əsədov qarşılıqlı səfərlərin ölkələrimiz arasında əlaqələrin inkişafına təkan verdiyini bildirmişdir. Milli Məclisin sədri Əfqanıstan parlament nümayəndə heyətinin bu yaxınlarda Azərbaycana səfərini xatırlatmış və dövlətlərimiz arasında münasibətlərin dərinləşməsində qanunverici orqanların rolunu xüsusi qeyd etmişdir. O demişdir ki, Milli Məclisdə Azərbaycan-Əfqanıstan parlamentlərarası dostluq qrupu yaradılmışdır. Qarşı tərəfdə də belə bir qrupun yaradılması dostluq əlaqələrimizin daha da möhkəmlənməsinə xidmət edəcəkdir.
Milli Məclisin sədri Dağlıq Qarabağ münaqişəsi barədə qonağa ətraflı məlumat vermiş, Azərbaycanın ədalətli mövqeyini müdafiə etdiyinə görə, Əfqanıstan hökumətinə və xalqına minnətdarlıq etmiş, bu siyasətin dəyişməyəcəyinə ümidvar olduğunu vurğulamışdır.
Əfqanıstan rəsmisi ölkəsi ilə Azərbaycan arasında tarixi və mədəni oxşarlıqları vurğulamış, Azərbaycanın Əfqanıstana onun bugünkü çətin vəziyyətində göstərdiyi yardıma görə təşəkkür etmişdir.
R.D.Spanta Ermənistan-Azərbaycan, Dağlıq Qarabağ münaqişəsinin həllində ölkəsinin Azərbaycanın mövqeyini dəstəklədiyini bir daha diqqətə çatdırmış və bildirmişdir ki, bu məsələ Əfqanıstanın xarici siyasətinin əsas istiqamətlərindəndir.
Görüşdə Azərbaycanın beynəlxalq sülhyaratma əməliyyatlarında iştirakı, eləcə də qarşılıqlı maraq doğuran digər məsələlər müzakirə olunmuşdur.

 
AZƏRBAYCANDA MİQRANTLARIN HÜQUQLARI QORUNUR

AzərTAc xəbər verir ki, dekabrın 17-də Dövlət Miqrasiya Xidmətində (DMX) mətbuat konfransı keçirilmişdir.
Xidmətin rəisi Arzu Rəhimov bildirmişdir ki, Prezident İlham Əliyevin uğurlu siyasəti nəticəsində milli iqtisadiyyatımız çox sürətlə inkişaf edir. Bunun nəticəsində ölkəmiz son illər miqrantların mənşə ölkəsindən təyinat ölkəsinə çevrilmişdir. Bu proseslərin tənzimlənməsi, ölkəmizin miqrasiya siyasətinin formalaşdırılması, ümumiyyətlə, miqrasiya proseslərinə nəzarətin təmin edilməsi məqsədi ilə 2007-ci il martın 19-da Azərbaycan Prezidentinin müvafiq Fərmanı ilə Dövlət Miqrasiya Xidməti yaradılmış və qarşıya ciddi tapşırıqlar qoyulmuşdur.
A.Rəhimov vurğulamışdır ki, Azərbaycanda qanunlara bu il edilmiş bəzi əlavələr və dəyişikliklər miqrasiya sahəsində bir sıra problemlərin aradan qaldırılmasına şərait yaratmışdır. Xidmətdə əcnəbilərin və vətəndaşlığı olmayan şəxslərin ölkədə müvəqqəti yaşama müddətinin artırılması, qaçqın statusunun müəyyən edilməsi ilə bağlı qərarlar qəbul edilir, onların müvəqqəti və ya daimi yaşamasına icazə verilməsi məsələlərinə baxılır.
DMX-nin rəisi diqqətə çatdırmışdır ki, miqrasiya sahəsində xarici ölkələrin təcrübəsinin öyrənilməsi üçün Avstriya, Niderland, Belçika, İsveçrə, Almaniya və Rusiyanın müvafiq qurumları ilə ikitərəfli əlaqələr yaradılmışdır.
Təkcə son iki ayda DMX-yə 7 minə yaxın əcnəbi və vətəndaşlığı olmayan şəxs müraciət etmişdir. Bu müraciətlərin hər birinə ayrı-ayrılıqda baxılmış, müvafiq qərarlar qəbul olunmuşdur.
Digər dövlətlərdə olduğu kimi, Azərbaycanda da miqrantların hüquqlarının qorunmasına lazımi şərait yaradıldığını söyləyən A.Rəhimov bildirmişdir ki, hazırda Bakıda və Yevlaxda miqrantların saxlanma mərkəzləri tikilir.

 
AVROPA YAYIM BİRLİYİ BAŞ ASSAMBLEYASININ 64-CÜ SESSİYASI BAKIDA KEÇİRİLƏCƏKDİR

Dünyanın 56 ölkəsinin 70-dən çox nüfuzlu televiziya şirkətini birləşdirən Avropa Yayım Birliyi Baş Assambleyasının 64-cü sessiyası Bakıda keçiriləcəkdir.
İctimai Televiziya və Radio Yayımları Şirkətinin ictimaiyyətlə əlaqələr və monitorinq şöbəsindən AzərTAc-a bildirmişlər ki, bu barədə Avropa Yayım Birliyinin prezidenti Friz Pleytgenin qurumun Baş direktoru İsmayıl Ömərova göndərdiyi məktubda deyilir.
Sessiyanın Bakıda keçirilməsi ilə bağlı qərarın Avropa Yayım Birliyinin idarə heyəti tərəfindən Baş Assambleyada qəbul olunduğunu deyən F.Pleytgen qeyd etmişdir ki, təşkilatın bütün üzvləri Cenevrədəki Daimi Xidmət çərçivəsində 2010-cu ildə Bakıya gələcəklər.

 
ATƏT-İN DEMOKRATİK TƏSİSATLAR VƏ İNSAN HÜQUQLARI BÜROSUNUN SEÇKİLƏRİ MÜŞAHİDƏ MİSSİYASI ÖZ HESABATINDA AZƏRBAYCANDA KEÇİRİLMİŞ PREZİDENT SEÇKİLƏRİNİN BEYNƏLXALQ STANDARTLARA CAVAB VERDİYİNİ BƏYAN ETMİŞDİR

 

AzərTAc xəbər verir ki, ATƏT-in Demokratik Təsisatlar və İnsan Hüquqları Bürosunun (DTİHB) Seçkiləri Müşahidə Missiyası 2008-ci il oktyabrın 15-də Azərbaycanda keçirilmiş prezident seçkilərinə dair yekun hesabatını açıqlamışdır. Hesabatda bildirilir ki, Azərbaycan hökumətinin dəvəti ilə sentyabrın 1-dən ölkədə fəaliyyətə başlamış missiya Avropa Şurası Parlament Assambleyasından və Avropa Parlamentindən olan nümayəndələrlə birgə seçkilərə hazırlıq prosesinin gedişini və seçkiləri heç bir maneə olmadan müşahidə etmişdir.
ATƏT/DTİHB-nin missiyası hesab edir ki, seçki prosesi qurumun öhdəliklərinə və digər beynəlxalq standartlara, habelə yerli qanunvericiliyin tələblərinə cavab vermişdir.
Hesabat müəllifləri daha sonra yazırlar: "Seçkilər dinc şəraitdə keçirilmişdir. Azərbaycan hökuməti bütün namizədlər üçün bərabər şərait yaratmışdır. Seçkilərin qalibi - Prezident İlham Əliyev öz çıxışlarında digər namizədlər üçün daha çox imkanların yaradılmasını istədiyini bəyan etmişdir. Seçkilərə hazırlıq prosesi sakit və hüquqi prosedurlar çərçivəsində keçmişdir".
Seçkiləri Müşahidə Missiyası səmərəli əməkdaşlığa və onlara yaradılan imkanlara görə Azərbaycan Respublikası Prezidentinin İcra Aparatına, Xarici İşlər Nazirliyinə, Mərkəzi Seçki Komissiyasına, digər hökumət strukturlarına, siyasi partiyalara, media qurumlarına və vətəndaş cəmiyyəti təşkilatlarına təşəkkür etmişdir.
Hökumət strukturlarının, xüsusilə də Mərkəzi Seçki Komissiyasının (MSK) fəaliyyətini yüksək dəyərləndirən missiya, MSK-nın seçicilərin maariflədirilməsi proqramını, dairə və məntəqə seçki kommissiyalarının üzvləri üçün təşkil etdiyi seminarları xüsusi vurğulamışdır.
Hesabatda deyilir: "MSK mətbuat işçilərinin, yerli və beynəlxalq müşahidəçilərin iştirakı ilə müntəzəm seminarlar təşkil etmiş, rəsmi internet səhifəsini daim yeniləmiş, qərar və təlimatları operativ şəkildə orada yerləşdirmişdir. Şəffaflığın təmin edilməsi məqsədi ilə seçki məntəqələrinin əksəriyyətində veb-kameralar quraşdırılmışdır. Seçici siyahılarını rəsmi internet səhifəsində yerləşdirən MSK bununla bağlı yaranacaq çətinlikləri dərhal aradan qaldırmaqdan ötrü seçicilər üçün "qaynar xətt" təşkil etmişdir. Seçici siyahıları ilə bağlı heç bir problem qeydə alınmamışdır".
Daha sonra hesabatda qeyd olunur ki, yeddi namizədin mübarizə apardığı prezident seçkilərində namizədlik üçün tələb olunan imzaların sayının 45mindən 40 minə endirilməsi ilə bağlı Seçki Məcəlləsinə dəyişikliklər edilmişdir. Mövcud Seçki Məcəlləsi demokratik seçkilərin keçirilməsinə imkan verir. Məcəlləyə 2008-ci ildə edilmiş dəyişikliklər həm ATƏT/DTİHB, həm də Avropa Şurasının Venesiya Komissiyası tərəfindən yüksək qiymətləndirilmişdir.
Namizədlər təbliğat-təşviqat kampaniyalarını maneəsiz həyata keçirmişlər. Seçkilər sakit və dinc şəraitdə keçmişdir. Ümumilikdə, səsvermə prosesi müsbət qiymətləndirilir. Nəticə etibarilə, ATƏT/DTİHB-nin Seçkiləri Müşahidə Missiyası hesab edir ki, seçki prosesi demokratik seçkilərin keçirilməsi üçün ATƏT-in öhdəliklərinə və digər standartlara, həmçinin yerli qanunvericiliyin tələblərinə uyğundur.
Hesabatda siyasi partiyalarla bağlı bölümdə qeyd olunur ki, Azərbaycanda rəsmi olaraq 40-dan çox siyasi partiya qeydiyyatdan keçmişdir. Hakim Yeni Azərbaycan Partiyası (YAP) bu partiyaların arasında daha çox inkişaf etmiş, yaxşı təşkil olunmuş struktura malik və daha çox üzvü olan (təqribən 450 min nəfər) partiyadır. Bu partiya ölkənin siyasi həyatında mühüm rol oynayır və hazırda parlamentdə 125 deputatdan 64-ü YAP-ın üzvüdür.

 

 
<< Başlat < Önceki 1721 1722 1723 1724 1725 1726 1727 1728 1729 1730 Sonraki > Son >>

Sayfa 1721 > 1744
  TKA 2008