TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
ALMANİYADAKI AZƏRBAYCANLILARI ƏLAQƏLƏNDİRMƏ MƏRKƏZİ İDARƏ HEYƏTİNİN TOPLANTISI KEÇİRİLMİŞDİR

Diasporla İş üzrə Dövlət Komitəsinin mətbuat xidmətindən AzərTAc-a bildirmişlər ki, Almaniyadakı Azərbaycanlıların Koordinasiya Mərkəzi idarə heyətinin toplantısı keçirilmişdir.
Ölkəmizin Almaniyadakı səfirliyində keçirilmiş və Dünya azərbaycanlılarının həmrəyliyi gününə həsr edilmiş tədbirdə ümummilli lider Heydər Əliyevin xatirəsi ehtiramla anılmış, onun Azərbaycan dövlətçiliyinin qorunması, ölkənin hərtərəfli inkişafı, eləcə də diaspor quruculuğu sahəsindəki tarixi xidmətlərindən ətraflı danışılmışdır. Bildirilmişdir ki, 31 dekabr - Dünya azərbaycanlılarının həmrəyliyi günü ulu öndər Heydər Əliyevin bütün dünyada yaşayan soydaşlarımıza bəxş etdiyi tarixi bir hədiyyədir. Bu bayram müxtəlif ölkələrdə yaşayan azərbaycanlıların birliyinin rəmzinə çevrilmişdir.
Toplantıda ölkəmizin Almaniyadakı səfiri Pərviz Şahbazov Azərbaycan icmalarının fəaliyyətindən, onların cəmiyyətə, ictimai-siyasi mühitə inteqrasiyasından, Mərkəzin işinin gələcəkdə daha da təkmilləşdirilməsindən danışmışdır. Qeyd edilmişdir ki, müxtəlif şəhərlərdə fəaliyyət göstərən cəmiyyətlər arasında fikir mübadiləsinin aparılması, birgə tədbirlərin təşkil edilməsi, konkret layihələrin reallaşdırılması zəruridir. Bütün bunlar Almaniyadakı Azərbaycan diasporunun daha da güclənməsində mühüm rol oynaya bilər.
Tədbirdə Mərkəzin təsis qrupunun üzvləri Bahəddin Kaya, Başar Kömür, Kəmalə İsgəndərova, Nüsrət Delbəstə, İbrahim Əhrari, Samirə Patzer-İsmayılova qurumun fəaliyyəti, əsas məqsəd və hədəfləri, gələn il üçün nəzərdə tutulan tədbirlər barədə məlumat vermişlər.

 
KLAUDİO BİZONYERO: DAĞLIQ QARABAĞ MÜNAQİŞƏSİNİN SÜLH YOLU İLƏ HƏLLİ BÜTÜN TƏRƏFLƏRİN MARAQLARINA UYĞUNDUR

AzərTAc xəbər verir ki, bunu NATO baş katibinin müavini Klaudio Bizonyero dekabrın 16-da Azərbaycanın xarici işlər naziri Elmar Məmmədyarovla görüşdən sonra keçirdiyi brifinqdə bildirmişdir. O demişdir: "NATO-nun bu məsələdə prinsipial mövqeyi ondan ibarətdir ki, münaqişənin sülh yolu ilə həlli həm Azərbaycanın, həm də Ermənistanın, ümumiyyətlə, bütün tərəflərin maraqlarına uyğundur. NATO ATƏT-in Minsk qrupu çərçivəsində danışıqlar prosesini dəstəkləyir".
Baş katibin müavini bildirmişdir ki, NATO Azərbaycanla münasibətlərə böyük əhəmiyyət verir və əlaqələrin daha da genişlənməsində maraqlıdır. Alyans Azərbaycanın müdafiə sektoru da daxil olmaqla, islahatlar prosesində əldə etdiyi nailiyyətləri bəyənir və islahatlar prosesini bundan sonra da dəstəkləməyə hazırdır.
NATO ilə Azərbaycanın müxtəlif sahələrdə əməkdaşlıq etdiyini deyən baş katibin müavini gələn il Azərbaycanın "Sülh naminə tərəfdaşlıq" proqramına qoşulmasının 15 illiyi olduğunu da xatırlatmışdır. Qonaq Azərbaycanın NATO-nun Əfqanıstandakı sülhməramlı əməliyyatında yaxından iştirakını, sülhməramlı kontingentin sayını artırmasını yüksək qiymətləndirmişdir.

 

 
NATO AZƏRBAYCANLA ƏMƏKDAŞLIĞIN SƏVİYYƏSİNDƏN RAZIDIR

Xarici İşlər Nazirliyinin mətbuat xidmətindən AzərTAc-a bildirmişlər ki, dekabrın 16-da nazir Elmar Məmmədyarov NATO baş katibinin müavini Klaudio Bizonyero ilə görüşmüşdür.
Görüşdə Azərbaycan və NATO arasında münasibətlərin vəziyyətindən söhbət getmiş, ölkəmizin təşkilatla əməkdaşlığı çərçivəsində "Fərdi tərəfdaşlığa dair əməliyyat planı"nın (FTƏP) yerinə yetirilməsi prosesi nəzərdən keçirilmişdir. NATO baş katibinin müavini planın icrasının uğurla davam etdiyini bildirmişdir.
K.Bizonyero xüsusilə NATO-nun Əfqanıstandakı sülhməramlı əməliyyatında Azərbaycanın yaxından iştirakını, sülhməramlı kontingentinin sayını artırmasını yüksək qiymətləndirmişdir.
Nazir E.Məmmədyarov Ermənistan-Azərbaycan, Dağlıq Qarabağ münaqişəsinin həlli sahəsində aparılan sülh danışıqları haqqında məlumat vermiş, münaqişənin həllinin yalnız Azərbaycanın ərazi bütövlüyü çərçivəsində mümkün olduğunu bildirmişdir.
Görüşdə beynəlxalq və regional məsələlər ətrafında geniş fikir mübadiləsi aparılmışdır.

 
AZƏRBAYCAN VƏ ƏFQANISTAN ARASINDA İQTİSADİ VƏ HUMANİTAR ƏLAQƏLƏRİN GENİŞLƏNDİRİLMƏSİ BARƏDƏ RAZILIQ ƏLDƏ OLUNMUŞDUR

 

AzərTAc xəbər verir ki, dekabrın 16-da Azərbaycan Respublikasının Baş naziri Artur Rasizadə Əfqanıstan İslam Respublikasının xarici işlər naziri Rangin Dadfar Spantanın rəhbərliyi ilə ölkəmizdə səfərdə olan nümayəndə heyəti ilə görüşmüşdür.
A.Rasizadə Azərbaycanı beynəlxalq təşkilatlarda dəstəklədiyinə görə Əfqanıstan hökumətinə və xalqına təşəkkürünü bildirmişdir.
Rangin Dadfar Spanta səmimi qəbul üçün minnətdarlığını bildirərək demişdir: "Əfqanıstan sülh və həmrəylik siyasəti yeridir, Azərbaycanın ərazi bütövlüyünü tanıyır. Ölkəmizin çoxsaylı problemləri olmasına baxmayaraq, biz Azərbaycan xalqının yanındayıq və onun haqq işini dəstəkləyirik".
Nazir Azərbaycan Respublikasının Əfqanıstana maliyyə və hərbi yardımına görə ölkəsinin hökuməti və xalqı adından təşəkkür etmişdir. Ölkəsinin uğurlarndan söhbət açan qonaq demişdir ki, son illərdə təqribən 6 milyon uşaq məktəbə getmişdir. Uzun illər ərzində ilk dəfədir ki, ölkə parlamentində qadınlar da təmsil olunmuşdur. Lakin terrorçuluq və dövlət strukturlarının zəifliyi hələ də Əfqanıstanın ən böyük problemi olaraq qalır.
R.Dadfar Spanta Bakıya səfəri müddətində keçirilmiş görüşlər barədə də məlumat vermiş, bildirmişdir ki, Azərbaycan Xarici İşlər Nazirliyində aparılmış danışıqlar zamanı iki ölkə arasında mədəni, iqtisadi və elmi əlaqələrin genişləndirilməsi haqqında razılıq əldə edilmişdir. O demişdir ki, Əfqanıstanda mütəxəssislərə kəskin ehtiyac var və əfqan tələbələrin təhsil almasında Azərbaycan bizə kömək edə bilər.
Qonaq ölkəsinin hökuməti adından Azərbaycanın Baş naziri Artur Rasizadəni Əfqanıstana səfərə dəvət etmişdir.
Dəvət razılıqla qəbul olunmuşdur.
 
ƏFQANISTAN DAĞLIQ QARABAĞ MÜNAQİŞƏSİNİN HƏLLİNDƏ AZƏRBAYCANIN MÖVQEYİNİ TAM DƏSTƏKLƏYİR
Xarici İşlər Nazirliyinin mətbuat xidmətindən AzərTAc-a bildirmişlər ki, dekabrın 16-da Azərbaycanın xarici siyasət idarəsinin rəhbəri Elmar Məmmədyarov Əfqanıstanın xarici işlər naziri Ranqin Dadfar Spanta ilə görüşmüşdür.
İki dövlət arasında əlaqələrin sürətlə inkişafını alqışlayan nazirlər, yüksək səviyyəli səfərlərin və görüşlərin baş tutmasını müsbət qiymətləndirmişlər.
Əfqanıstan rəsmisi ölkəsi ilə Azərbaycan arasında tarixi və mədəni oxşar cəhətləri vurğulamış, Azərbaycanın Əfqanıstana onun bugünkü çətin vəziyyətində göstərdiyi yardıma görə təşəkkür etmiş, ölkəmizdə əldə olunan nailiyyətlərdən fərəh duyduğunu bildirmişdir.
R.D.Spanta, həmçinin Ermənistan-Azərbaycan, Dağlıq Qarabağ münaqişəsinin həllində ölkəsinin Azərbaycanın mövqeyini dəstəklədiyini bir daha diqqətə çatdırmışdır.
Nazirlər iqtisadi sahədə də əməkdaşlığı dərinləşdirməyi, müqavilə-hüquq bazasını təkmilləşdirməyi, müxtəlif sahələrdə əməkdaşlıq qurmağı zəruri saymışlar.
Qonaq Azərbaycanın diplomatik xidmət, elm və təhsil, tibb, kənd təsərrüfatı və digər sahələrdə təcrübəsinin öyrənilməsində maraqlı olduğunu da diqqətə çatdırmışdır.
Görüşdə qarşılıqlı maraq doğuran digər məsələlər müzakirə olunmuşdur.
 
<< Başlat < Önceki 1721 1722 1723 1724 1725 1726 1727 1728 1729 1730 Sonraki > Son >>

Sayfa 1730 > 1750
  TKA 2008