TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Azerbaycan
“ŞAHDƏNİZ-2” LAYİHƏSİ ÇƏRÇİVƏSİNDƏ HASİL EDİLƏCƏK QAZIN SATIŞI İLƏ BAĞLI DANIŞIQLAR APARILIR
Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev AzərTAc-a bildirmişdir ki, 2009-cu ildə Azərbaycan Gürcüstana 452 milyon kubmetr qaz ixrac edəcəkdir. Rövnəq Abdullayev demişdir ki, “Şahdəniz-2” layihəsi çərçivəsində hasil ediləcək mavi yanacağın satışı ilə bağlı dünyanın bir sıra iri qaz şirkətləri ilə danışıqlar aparılır. ARDNŞ prezidenti onu da əlavə etmişdir ki, 2010-cu ilədək Gürcüstanda qaz satışının 80-85 faizini Dövlət Neft Şirkəti həyata keçirəcəkdir. Gürcüstanın 29 qaz satış şəbəkəsinin Azərbaycan Dövlət Neft Şirkətinə verildiyini deyən Rövnəq Abdullayev bildirmişdir ki, rəsmi Bakı 2009-cu ildə bu ölkəyə 452 milyon kubmetr qaz ixrac edəcəkdir.
 
GÜRCÜSTANDA KEÇİRİLƏN BEYNƏLXALQ ÇAY FESTİVALINDA LƏNKƏRAN ÇAYLARI MÜKAFATA LAYİQ GÖRÜLMÜŞDÜR
AzərTAc xəbər verir ki, Qafqaz Biznes və İnkişaf Şəbəkəsi, Gürcüstan Çay Assosiasiyası, Qafqaz Beynəlxalq Çay Assosiasiyası Tbilisi şəhərində Qafqaz beynəlxalq çay festivalı keçirmişlər. Tədbirdə Türkiyə, Rusiya, Azərbaycan, Gürcüstan və digər ölkələrin çaybecərənləri istehsal etdikləri məhsulları nümayiş etdirmişlər. Festivalda Lənkəranda istehsal edilmiş “Fərmançay” və “Hirkançay” quru çay növləri Gürcüstan Kənd Təsərrüfatı Nazirliyinin mükafatına layiq görülmüşdür. Qafqazda ilk dəfə keçirilən beynəlxalq tədbirdə Azərbaycan Çay Assosiasiyasının prezidenti, Lənkəran Dövlət Universitetinin kafedra müdiri, professor Fərman Quliyev çıxış etmişdir. O, Azərbaycanda aparılan aqrar islahatların və kənd təsərrüfatına dövlət dəstəyinin ölkəmizdə çayçılığın inkişafına təkan verdiyini, respublikamızın subtropik rayonlarında bu sahədə uğurlu nəticələrin qazanıldığını diqqətə çatdırmışdır.
 
AZƏRBAYCAN ALİMLƏRİ BEYNƏLXALQ KONFRANSDA İŞTİRAK ETMİŞLƏR
AzərTAc xəbər verir ki, İtaliyanın Florensiya şəhərində İslam memarlıq irsinin qorunması və bərpası problemlərinə həsr edilmiş beynəlxalq elmi konfrans keçirilmişdir. Azərbaycan Memarlıq və İnşaat Universitetinin (AMİU), İtaliyanın Romualdo del Bianko Fondunun və Florensiya Universitetinin birgə təşkil etdiyi tədbirdə Türkiyə, İran, Qazaxıstan, Rusiya, Suriya, Misir və Fransa alimləri dəvət olunmuşdular. Konfransda AMİU-nun rektoru, professor Gülçöhrə Məmmədova, AMEA-nın Memarlıq və İncəsənət İnstitutunun direktor müavini, professor Ertəgin Salamzadə və AMİU–nun prorektoru Nərgiz Abdullayeva da iştirak etmişlər.
 
AZƏRBAYCANIN FƏRDİ UÇOT SİSTEMİNDƏ 6 MİNDƏN ÇOX XARİCİ ÖLKƏNİN VƏTƏNDAŞI QEYDİYYATDAN KEÇMİŞDİR

Dövlət Sosial Müdafiə Fondunun (DSMF) sədri Səlim Müslümov AzərTAc-a bildirmişdir ki, təmsil etdiyi qurum tərəfindən yaradılan fərdi uçot sistemində indiyədək qeydiyyata alınmaq üçün 1 milyon 657 min nəfər qeydiyyat forması ilə müraciət etmişdir. Onlardan artıq 1 milyon 484 min 251 nəfərinə hesab açılmışdır.
S.Müslümov vurğulamışdır ki, artıq xarici ölkə vətəndaşlarından 6 min 571 nəfər fərdi uçot sistemində qeydiyyatdan keçmişdir. Bunlar əsasən Türkiyə, Rusiya, İran və Hindistan vətəndaşlarıdır. Qeydiyyatdan keçənlərin 27 faizi MDB ölkələrinin payına düşür.
Hazırda muzdla işləyənlərin sayının 40 minə yaxın olduğunu deyən sədr diqqətə çatdırmışdır ki, pərakəndə ticarət, özəl nəqliyyat sektorlarında, şadlıq evləri, restoran biznesi sahəsində işləyənlərin qeydiyyata alınması üçün müvafiq tədbirlər görüləcəkdir.

 
QAZAXISTANIN MİLLİ BAYRAMI ŞƏRƏFİNƏ

AzərTAc xəbər verir ki, dekabrın 15-də Qazaxıstanın Azərbaycandakı səfirliyi öz ölkəsinin milli bayramı - Müstəqillik gününün 17-ci ildönümü münasibətilə "Gülüstan" sarayında rəsmi qəbul təşkil etmişdir.
Qazaxıstanın ölkəmizdəki səfiri Serik Primbetov vurğulamışdır ki, 17 il əvvəl respublikanın Ali Soveti ölkənin müstəqilliyi haqqında Konstitusiya Qanunu qəbul etmişdir.
Diplomat ötən müddətdə ölkəsinin keçdiyi inkişaf yolundan danışaraq bildirmişdir ki, hazırda Qazaxıstan dünya birliyində layiqli yer tutur, ən dinamik inkişaf edən beş ölkə sırasına daxildir.
S.Primbetov demişdir ki, əsası Azərbaycan xalqının ümummilli lideri Heydər Əliyev və Qazaxıstan Prezidenti Nursultan Nazarbayev tərəfindən qoyulmuş dostluq və qardaşlıq münasibətlərini bu gün Prezident İlham Əliyev uğurla davam etdirir. Azərbaycan və Qazaxıstanı çoxəsrlik mehriban qonşuluq və qarşılıqlı dəstək ənənələri birləşdirir. Əminəm ki, bizim qarşılıqlı səylərimiz bundan sonra da bu nəcib ənənələrin artırılmasına, xalqlarımızın və ölkələrimizin tərəqqisi, regionda sülh, təhlükəsizlik və sabitlik naminə dövlətlərarası münasibətlərin daha da inkişaf etdirilməsinə yönəldiləcəkdir.
Milli Məclis sədrinin birinci müavini Ziyafət Əsgərov Azərbaycan Prezidenti İlham Əliyevin təbrikini, Qazaxıstan xalqına əmin-amanlıq və firavanlıq arzularını yetirmişdir.
Z.Əsgərov bildirmişdir ki, ölkələrimiz arasında həmişə səmimi münasibətlər olmuşdur və bu münasibətlər müstəqillik qazanıldıqdan sonra intensiv inkişaf etməyə başlamışdır. Azərbaycan xalqının ümummilli lideri Heydər Əliyevin və Prezident Nursultan Nazarbayevin şəxsi dostluq münasibətləri bu əlaqələrin formalaşmasında mühüm rol oynamışdır.
Qəbulda Azərbaycanın dövlət və hökumət rəsmiləri, xarici ölkələrin Bakıdakı səfirləri, ictimaiyyətin nümayəndələri iştirak etmişlər.

 
<< Başlat < Önceki 1731 1732 1733 1734 1735 1736 1737 1738 1739 1740 Sonraki > Son >>

Sayfa 1734 > 1749
  TKA 2008