TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



FISU җитәкчелеге Казанның 2013 елгы Универсиадага әзерлеген югары бәяләде
(Казан, 18 февраль, «Татар-информ», Кристина Иванова). Казанга визит белән килгән Халыкара студентлар спорт федерациясенең беренче вице-президенты Клод-Луи Галльен Татарстан башкаласының 2013 елгы Бөтендөнья универсиадасында катнашучыларны кабул итәргә әзерлеген югары бәяләде.

“2013 елгы Универсиадага әзерлек дәрәҗәсен “бик югары” дип бәяләргә мөмкин, - дип белдерде бүген FISU ның беренче вице-президенты Казанда журналистларга биргән интервьюсында. – 2013 елгы Уеннарда Россия җыелма командасында Татарстан вәкилләре дә күп булыр дип уйлыйм – алар спорт һәм психологик яктан бик яхшы әзерләнгән”.

Искәртеп узабыз, Клод-Луи Галльенның Казанга визит белән килүенең төп максаты – Татарстан башкаласында FISU ның Халыкара белем бирү үзәген төзү концепциясе турында фикер алышу. Кичә ул әлеге уңайдан ТР Президенты Рөстәм Миңнеханов белән очрашты.
“Универсиада нибары ике атна дәвамында үтүгә карамастан, Уеннарның мирасы озак елларга калачак, - дип ассызыклады FISU ның беренче вице-президенты. - Әгәр без Казанда әлеге юнәлештә белем бирү үзәген булдыруга ирешсәк, бу бөтен дөньядагы студентлар өчен зур мөмкинлекләр ачачак”. Галльен әфәнденең сүзләренә караганда, нәкъ менә Казанның FISU ның Халыкара белем бирү үзәген төзү урыны итеп сайлануы очраклы түгел, чөнки ТР Президенты – спорт ягыннан бик әзерлекле кеше һәм ТР башкаласы уңайлы урында – “Ауропа белән Азия арасында” урнашкан. 

Искәртеп узабыз, бүген Татарстан башкаласы кунакларының (Галльеннан тыш, Казанга FISU ның белем бирүне үстерү бүлеге директоры Коль Гжелошай да килде) эш көне XXVII Бөтендөнья җәйге студентлар уеннары объектлары белән танышудан башланды. Кунаклар “Ак Барс” Көрәш сарае һәм “Олимп” универсаль спорт комплексы залларын карады. Алга таба FISU җитәкчеләре Универсиада авылына килде, анда Бөтендөнья җәйге студентлар уеннары барышында 13,5 меңнән артык спортчы һәм делегация әгъзалары яшәячәк.
Уникаль студентлар шәһәренә визиты ахырында FISU ның беренче вице-президенты Универсиада авылының мактаулы кунаклар китабында истәлеккә язма калдырды. Кунаклар шулай ук “Буревестник” бассейнында һәм Теннис академиясендә булды.
 
  TKA 2008