TR  |  EN  |  RU
turkey turkey   azerbaijan kazakhstan kyrgyzstan turkmenistan uzbekistan kktc qha TAT BAŞQ
Ana Sayfa
Birlik Hakkında
Üye Haber Ajansları
Bildiri
Başkanın Mesajı
Tüzük
Haberler



Tubıl şähäre Seber tatar mädäniät üzägeneñ eş yunäleşläre

(Tömän, 25 noyabr', «Tatar-inform», Bibinur Sabirowa). Tubıl şähäre Seber tatarları mädäniät üzäge üzeneñ 20 yıllığın küzgä kürenerlek uñışlar belän qarşı aldı.
20 yılğa suzılğan eş däwerendä Tubıl şähäre Seber tatar mädäniät üzäge 6 meñ ähämiätle mädäni çara ütkärgän: konsertlar, törle temalar buyınça seminarlar, spektakl'lär, tatar balaların tuğan telgä öyrätü sisteması, icadi şäxeslär belän oçraşu, alarnıñ icat cimeşlären täqdim itü kiçäläre, fänni-ğamäli konferensiälär häm başqa küp törle çaralar. Üzäkneñ berençe yıllarında uq pedagogiä institutında belem alğan icadi şäxes Rawilä Qutumowa başlap oyıştırıp cibärgän tarix-etnografiä muzee häm Alsu Simonova citäkçelegendäge kitapxanä qızıqlı programma buyınça ezlekle eş alıp baralar, soñğı yıllarda Yaqub Zänkiew muze da oyıştırıldı, ul inde Üzäkneñ zur ğorurlığına äwerelde.
Kitapxanä şähär mäktäpläre uquçılarına, yuğarı uqu yortları studentlarına, ğalimnärgä xezmät kürsätä, anıñ fondında 4 meñ tatar kitabı tuplanğan.
Üzäkneñ fänni-ezlänü laboratoriäse seber tatarları tarixı, mädäniäte, ğoref-ğadätläre turındağı materiallar, yazmalar tuplaw belän bergä, alarğa fänni analiz da yasap, Üzäk eşçänlegen tirän mäğnäle, maqsatçan itep alıp barırğa yärdäm itä. Bu laboratoriädä kileşü nigezendä filologiä, tarix fännäre kandidatları häm doktorları xezmät itte: Vyaçeslav Sofronov, Niqolay Tomilov, Foat Valeev, Aleksandr Neskorov, Aleksey Konev, İğor Beliç h.b.
Üzäk nigezendä «Miras» isemle qullanma sänğat törkeme, «Yäş kray öyränüçe», «Yäş jurnalist telestudyase» oyışmaları eşli, alarğa 50 dän artıq yäşüsmer yöri.
«İsker» isemle mäğärif-ağartu yunäleşendäge oyışma waqıt-waqıt bulsa da, şul isemdäge gazeta da çığara.
2005 yılnıñ oktyabr' ayında Seber tatar mädäniät üzäge «Seber tatarları tormışına säyäxät» dip atalğan programmasın täqdim itü çarasın ütkärep, xuplaw aldı. Bu programma Tubıl şähäreneñ turistik programmasına da kertelde. Turizm agentlığı belän tığız elemtädä eşläp, Mädäniät üzäge Rossiäneñ başqa töbäklärennän häm çit illärdän Tubıl şähärenä kilgän turistik firmalarğa häm ğammäwi mäğlümat çaralarına şul programmanıñ 5 törle yunäleşen kürsätep, xuplawğa häm maqtawğa layık buldı.
Tubıl şähäre Seber tatar mädäniät üzägeneñ «Duslıq» biyu ansamble, «Zäğfran» häm balalar «Süzge» cır ansambl'läre häm belgeçläre ölkäneñ başqa töbäklärenä dä çığıp, millättäşlärebez arasında mäğrifät eşen oyıştıruğa bağışlanğan seminarlar ütkärälär. Üzäkneñ icadi kollektivları şähär häm ölkä festival'läreneñ laureatları isemnären yörtälär.
Naciä Xäkimowa citäkçelegendäge vokal «Zäğfran» ansamble Tübän Qama şähärendä bulıp ütkän Xalıqara «Duslıq cırı-92», Tubıl şähärendä ütä torğan «Muzey dusların qarşılıy» Bötenrossiä festival'läre diplomantı, «Seber moñnarı» xor kollektivı ölkä «Duslıq küpere» festivale laureatı, ä Mönäwärä Andryuşçik citäkçelegendäge «Duslıq» biyu ansamble Soçi şähärendä ütkän Bötenrossiä «Roza vetrov» balalar häm yäşlär festivale laureatı.
Elekke yıllarda 130 ştat berämlegenä iä bulğan Seber tatarları mädäniät üzägendä bügenge köndä törle üzgärtep qorular näticäsendä 30 xezmätkär genä qaldı, ämma Üzäkneñ eşe, qayber yuğaltular kiçerügä karamastan, tuqtap qalmadı.
1991 yıldan birle bu Üzäk belän Safiulla İl'yasov citäkçelek itä.
Seber tatar mädäniät üzäge häm anıñ xezmätkärläre Tubıl şähäre başlığınnan, şähär häm ölkä mädäniät komitetlarınnan, ölkä Gubernatorınnan, Rossiä Federatsiäseneñ Mädäniät ministrlıygınnan, Tatarstan Prezidentınnan, Bötendönya tatar kongressınnan alğan Maqtaw gramotaları, Räxmät xatları belän xaqlı ğorurlanalar. Tatarstan Prezidentı yärdämendä Tubıl şähäreneñ Sabantuylarına här yıl sayın Tatarstan delegatsiäse kilmi qalmıy, dip tirän qanäğätlänü belderä Üzäkneñ direktorı Safiulla İl'yasov.

 
  TKA 2008